عن شعب #مصر ,,, انا و هو و #مبارك و #الاخوان
July 5, 2013 at 10:47 am · Filed under #Egypt, #Jan25, #KhaledSaid, #rEvolution, #Tahrir, #tweetshare3, 99%, ولاد البلد, افتكاساتى المكتوبه and tagged: #Egypt, #Jan25, Khaled Said خالد سعيد #Jan25 #Egypt Egypt, مبارك, مصر, الاخوان المسلمين, اخوان, ثورة مصر
الزمان:يوليو2004
المكان:تاكسي من رمسيس لبيتنا
قال لي سواق تاكسي فوق ال60
البلد بقت زباله مش دي #مصر اللي عشت فيها طفولتي واللي حاربت عشانها.
قلت: له حنرجعها يا حاج إدعيلنا.
قال:ترجع مين ده شعب نايم ع الترعه.
قلت:ما هو نايم عشان فاكرها حتتعدل لما يعرف انها حتقلب خراب و الترعه حتنشف حيقوم من ع الترعه.
قال:الحكومه مش حتسيبوا يعرف حاجه يا ابني كله في ايديهم.
قلت:ده زمان يا عم الحاج ايام ما كان الإعلام هو منبر الازهر فيقبضوا على محمد كريم و ينيموا الناس
و ايام ما كان كل اللي بيسمعوه صوت العرب و يقروه الاهرام و الاخبار,,دلوقتي احنا الاعلام و بكره احنا اللي حننقل الاخبار و كله حيعرف
و الشعب لما بيعرف الحقيقه بيتصرف صح يا عم الحاج
قال: يا ابني ما تتعبش نفسك مش حيقوم الشعب ده ابدا انا عايش ليل نهار في الشارع و اكبر منك ب40 سنه و عارف باقولك ايه
قلت:سمعت عن ثورة القاهره الأولى و التانيه ايام الحمله الفرنسيه يا حاج؟
سمعت عن ثورة 1919 ايام الاحتلال الانجليزي و هرتلة العيله المالكه؟
سمعت عن إنقلاب عسكري في 1952 و الشعب لقاهم بينفذوا وعودهم فصدقهم و بقت ثورة 52؟
سمعت عن المصريين اللي نزلوا الشوارع بعد خطاب التنحي في 67 قالوا حنحارب؟
سمعت عن مظاهرات 77 لما السادات افتكر انه قادر يستهبل الشعب و يغلي اساسيات الحياه في نظرهم؟
قال: بس كفايه ايوه سمعت و عشت حاجات منهم كمان
قلت: يبقى الشعب بيتحرك لوحده ولا لأ يا عم الحاج؟
قال:اه بس قليل
قلت:حلو أوي اهو قليل دي نفس بداية كلامنا “ان الشعب يعرف”
اتحرك ايام نابليون لما عرف الحقيقه عن طريق شيوخ الازهر لأنه كان بيثق في كلامهم و كانوا مصدر المعلومات الوحيد الموثوق فيه
و سكت سنين طويله لغاية عرابي
و بعد كده اتحرك بعد مع سعد زغلول لما عرف
و مع 52 لما عرف و صدق أفعالهم
و في 77 لما شاف غرور من السادات
و غاب كتير في النص لما السلطه خبت المعلومات أو اتهمت اي حد بيتكلم إنه عدو الوطن او اي اتهام تاني من التهم الجاهزه اللي ما بتتغيرش
قال: فكرتني انا اعرف ناس حاربت في 73 و نزلوا في 77
كانوا ابطال العروبه و بقوا اعداء الوطن في 4 سنين
قلت:بس كده يا عم الحاج الحكومات لو عايزه الشعب يعرف الحقيقه كانت عملت تعليم كويس و قال لت له المعلومات بجد من غير تحوير و كدب,,
بس لأنهم بيخافوا على سلطتهم بيخبوا خيبتهم بالكدب و إتهام اللي يقول الحقيقه
و انت سيبت الجيش ليه يا حاج؟
قال:افتكروني إخوان فعملوا شوية حركات كده و لقيتني معاش و اخدت المكافأه جبت بيها التاكسي ده
و انت إخوان فعلا يا حاج؟
لأ انا بس باشتغل معاهم في اي خير بيعملوه شنط رمضان و قوافل طبيه و معارض سلع مخفضه و الحاجات دي
قلت:هو ده الخير يا عم الحاج؟
قال:اه طبعا يا ابني
قلت:طب ما الحكومه بتوزع تموين مخفض و وزارة الصحه بتعمل قوافل طبيه و في سلع مخفضه في الجمعيات الاستهلاكيه
قال:ايوه بس الاخوان بتوصل للناس اللي الحكومه ما بتعبرهاش
قلت:و لما بيوصلوا بيعملوا حاجه مختلفه عن الحكومه؟
قال:مختلفه ازاي!!!!؟
قلت:عملوا مدارس في المناطق المحرومه مثلا؟
عملوا قناة تليفزيون ولو حتى خارج مصر و نقلوا الحقيقه للناس؟
عرفوا الناس حقيقة ان في معتقلين في امن الدوله غيرهم؟
فتحوا مصانع مثلا و شغلوا الناس اللي بيوزعوا عليهم شنط رمضان؟
قال: لأ
قلت:يبقى مفيش فرق يا حاج بين حكومة مبارك و بين الاخوان غير الدقن و ان ده حيقولك مساء الخير و ده حيقولك السلام عليكم
إنما التصرفات واحده و اللعب على إحتياجات الناس واحد
و الاصرار على ان الناس ما تتعلمش ولا تعرف الحقيقه واحد
قال:تقريبا عندك حق هو الشعب ده عبيط اصلا و غاوي اللي يستعبطه
قلت:لا يا حاج احنا زي الفل بس نعرف الحقيقه,,نزلني هنا بقا يا عم الحاج
قال:طب و الحل؟؟
قلت:مش احنا اتفقنا انه بيقوم ياخد حقه بس لما يعرف و يصدق
قال: اه اتفقنا
قلت:خلاص يبقى احنا بس نعرفه الحقيقه وهو حيعرف الحل لوحده من عند ربنا دي بلد ضامنه الخلود يا حاج ما يتخافش عليها و شعب متوصي عليه من فوق سابع سما يتخاف منه
Photo by:
المتفائل الفاني
شادي الغزاوي
Permalink
Leave a comment