هي فوضى؟؟؟ لأ ياعمال #مصر هي ثوره

July 4, 2012 at 7:49 am · Filed under #Egypt, #Jan25, #Tahrir, #tweetshare3, ولاد البلد, افتكاساتى المكتوبه and tagged: Khaled Said خالد سعيد #Jan25 #Egypt Egypt, فكرة الثوره, مصر, الثوره فكره, الثوره انت, العمال, انت الثوره, ثورة مصر, عمال مصر

هي ثوره ولا إصلاح؟ ولا طيبة قلب حتقلب بهرطقه و فوضى؟؟
الإصلاح يكون بجبر الكسر و تنظيف الجرح
ولكن حين تتراكم الجراثيم و يتعفن الجرح فلا مجال لوضع الجبس و انتظار الغرغرينا

ايوه هي ثوره

ثوره على فساد اخلاق و تغييب عقول و انهيار تعليم و حتى على الخطاب الديني و طريقته
ثوره على ترزية القوانين و من قاموا بتعقيد خيوط غزل الثوب القانوني المصري ليفلتوا من ثغراته و ليس ليعاقبوا من يخطئ

يا ولاد البلد احنا عارفين السلم بيتكنس من فوق
و لو ما اتلمش التراب كلما تراكم بعد درجتين تلاته و انت بتكنس فأنت بتأجل المصيبه للقاع
و بتصدر كل المشاكل للقاعده الجماهيريه العريضه
و مع غليان المجموع المتراكم عبر الزمن و بإضافة تراكم تراب كنس السلم عليهم
في ليله سهل الثوره تقلب فوضى
و سهل يكفر المجموع بفكرة التغيير و يدعوا يا رب نرجع تاني

ايوه هي ثوره مش إصلاح

الثوره مش مظاهره…….انت الثوره

الثوره فكره و الأفكار ليها أجنحه كونوا جناحات الثوره و ثوروا في كل افعالكم و كمان على انفسكم

اسكتوا خالص
بصوا حواليكوا
في حاجه تبسط؟؟؟؟
كام مهمه بتعملها و هي مش شغلتك؟؟؟
بتقرأ؟؟؟
قادر تضحك من قلبك مش هروب من هموم الدنيا ؟؟؟
في كام مدمن حواليك مخدرات ولا اي شكل تاني من اشكال الادمان ؟؟؟حتى إدمان النكت تغييب
عشان لما يتقال ان كله لازم يتنسف و يتنضف تحته و بعد كده يتبني تاني تلاقي ناس بتعترض و تقول عايزين تسقطوا الدوله

نسقط الدوله؟؟
هي فين الدوله؟؟؟
هي الدوله دي مباني مثلا؟؟؟؟
طب فين مباني الدوله الأثريه؟؟؟؟؟؟؟؟

هي الدوله ايه غير انا و انت و اللي حوالينا

مش احنا اللي بنشتغل و نتيجة شغلنا ده بتتواجد الدوله
و عشان نشتغل مش لازم نفكر
و عشان تفكيرنا ما يكونش هري مش لازم نقرأ
و عشان نقرأ مش لازم نتعلم
فين التعليم؟؟؟؟؟

فرحان انك انتخبت و اتصورت مع صباعك البمبي و الموف و الازرق
الف مبروك
مصداقية البرلمان تتأكل
عارف ليه؟؟؟
لأنك ما تعرفش اصلا شغلة البرلمان ايه ولا النائب حتى عارف اولوياته ايه
لأن انتوا الاتنين ضحايا تجريف و عقاب مستمر لمصر و كل ما بها

و عارف ليه البرلمان كان مهدد بالحل بامر القضاء  و أهو اتحل
لأن القوانين بها ثغرات اكتر ما بها من تناسق لأن اللي عملها كان بيسد خانة وظيفته و ورقه متستف و خلاص
مالوش دعوه بقا النتيجه ايه هو ماله
ما تبصش تحت رجليك يا ابن البلد
ارفع راسك فوق انت مصري

لا انا مش باقولك تشك في القضاء بس خللي بالك يا ابن بلدي
حتى القضاء مصداقيته بتتأكل بعد حركات قضية التمويل الأجنبي اللي كلها اصلا هجايص من أولها لاخرها ,,,
ابقوا قابلوني لو حد صدق الحكم على مبارك مهما كان الحكم في اي قضيه من القضايا الهلاميه اللي بيتحاكم بيها

الداخليه عمالين نرمم فيها و في وسط كلام عن الاصلاح راحوا قبضوا علي متهمين بالاعتداء على مواطن مصري اكتشفنا بعد كده ان مفيش حد اعتدى عليه اصلا
قادة الجيش بنتحايل عليهم ما يحطوش جيشنا في مواجهة المواطنين عشان ما يديش فرصه ان حد يقول الجيش بيضرب ولا بيعذب ولا بيقتل االمصريين,,,طنشونا

و حنفضل نسألكم….. هما ليه الشرفاء شايفين انهم قلائل و ضعفاء

مين مفهمك انك ضعيف يا المصري و محتاج تتسند على عامود الجيش ولا عامود القضاء
الدوله ليها عواميد واحده لا تتغير
انت يا المصري يا ابن البلد
انت الدوله
انت الحكومه
انت الجيش
انت الفلاح
انت السند مش المسنود

يا شرفاء مصر يا ولاد البلد
ايها الساده احنا بلدنا غرقانه في بحر فساد راكد ميت متعفن من السبعينات

بعد نصر اكتوبر كان لازم مصر تنهزم بطريقه غير عسكريه

حاربونا بطريقة النفس الطويل,,,باسلوب الحرب البارده بين روسيا و امريكا
و للاسف في مصريين ساعدوا في ده بحسن نيه او قاصدين او مجبرين تحت تهديد

و من اهم استراتيجيات الحرب البارده انك تحط ناس دون كفاءه في مناصب هامه
تشغل المكوجي بتاع لبن و بتاع اللبن يفتح فرن و الفران يفتح سنترال و عالم الذره يسافر او يتقتل او يتخنق و الدكتور ما يلاقيش قطن ولا شاش و المهندس يبقى محلل كروي و لعيب الكوره إعلامي و الإعلامي مجرم و رجل الاعمال يتداين و الحرامي ياخد تمويل و البلطجي مندوب في الانتخابات و نائب الشعب التشريعي يجيب واسطه و طالب العلم يتذل و يدفع رشاوي و دكتور الجامعه ما يلاقيش ياكل فالمعيد يبيع الامتحانات و اللي يزور الانتخابات جااااامد يمسك لجنة الانتخابات و مدير ادارة الدفاتر يمسك ادارة الكمبيوتر و مهندس الكمبيوتر يمسك نت كافيه و صاحب النت كافيه اصلا كان سباك …………..نقول تاني؟؟؟؟؟

مفيش صندوق زباله ينفع نشيل فيه زبادي مهما نضفناه و صلحنا كسوره

كفاااااايه تخوين لبعض و كمان كفاااايه استسلام

الجزاء من جنس العمل، و كما تدين تُدان، و الديان حي لا يموت
يا ولاد البلد توكلوا على الله ولا تتواكلوا

يا ولاد البلد ……………………….العمال فين؟؟؟؟؟؟

ايوه انتوا فين؟

مستنيين حقوقكم تحت السلم؟؟؟؟؟؟؟

المتفائل الفاني

شادي الغزاوي

Permalink