Shady EL-Balad اصحى يا بلد

مصر حتفضل غاليه عليا

الروينى و الطريق الى العباسيه


التحديثات تحت فى اخر الصفحه

بعد ثورة 23 يوليو قال عبد الحليم

سكت الكلام و البندقيه اتكلمت

و الان شباب مصر بيقول قبل و بعد ثورة 25 يناير

سكت الكلام و الفيديوهات اتكلمت

بينا يا مصر نحيي الماضى بروح العصر

طبعا ده

7UP

عنان يحتسى السفن أب مع مايك مولين رئيس الاركان الامريكى

أرجوك أوعى تفهمنى صح

و قبل كل الكلام

احب أقول

اللى يقول ان شعب مصر طريقة تعبيره عن رفضه لمسيره سلميه هى الهجوم على المسيره بالسكاكين و الطوب و السنج و المولوتوف هو شخص يستحق ان يحاكم أمام الشعب المصرى بكامله الشعب المصرى أرقى من أن يكون فرق بلطجيه تعبر عن رفضها بالمولوتوف و الجيش المصرى أرقى من أن يقف على الحياد حين يكون هناك هجوم على مصريين حتى لو كان من يهاجمهم مصرى أيضا

ملخص البحث

ما قبل الحدث : : : مظاهره سلميه تتوقف امام كردونات الجيش و الأمن المركزى
الحدث : : : مصادمات بعد الهجوم على المسيره بالعباسيه مع إقامة اذان المغرب
النهايه : : : المصريين فهموها و تقابل الفريقان ليهتفوا الشعب و الشعب ايد واحده

الفيديو الأول اللواء الروينى يعترف انه كان مصدر الشائعات داخل ميدان التحرير

و بعد اعترافه انه كان مصدر الإشاعات داخل الميدان

يطلق الان شائعه جديده و لكن المره دى الشائعه على من المعتصمين داخل الميدان

تعالوا نشوف كده

و الان فيديو نقلا عن الأهرام

كل حقوق النشر محفوظه للأهرام اونلاين © 2010 Ahram Online

من خروج المسيره من التحرير حتى الاعتداء على المتظاهرين بالعباسيه

فين المولوتوف اللى مع المتظاهرين

شفنا كلنا رفاق المسيره العسيره ماشيين فى وسط الشوارع و المواصلات على اليمين و سايبين باقى الشارع للمرور

لو الناس دى مخربين كانوا على الاقل قفلوا الشارع وراهم

كانوا هاجموا المحلات فى طريقهم و ما أكثرها بشارع رمسيس

كانوا هاجموا مقر صحيفة الجمهوريه بدلا من ان يكتفوا بالهتاف ضدها

” الكدابين اهم الكدابين أهم “

تمام لحد كده !!!!!؟؟

لأ لسه

دى شهاده مسجله من المقدم محمود عبد النبى

عن احداث العباسيه

و بعد ما سمعنا كلام المقدم محمود عبد النبى

تعالوا نشوف فيديو المصرى اليوم اللى تقريبا بيجسد كل كلام المقدم محمود الكاميرا مع المسيره من التحرير و حتى بعد الاعتداء على المسيره بالعباسيه لحظة إقامة صلاة المغرب

و اخر كلامى

لأ ده مش كلامى

دى شهادة حق لواحد كان فى العباسيه

اتزنق فى ناحيه مع صديق له

و اخوه و اخو صديقه فى الناحيه التانيه

الشهاده نقلا عن

http://www.facebook.com/abdelrahman.wahba

اقروها حتى النهايه عشان الكل يعرف ان المصريين ما بينضحكش عليهم

شعب صايع بس يعرف بداية الخيط و هو لوحده بيعرف باقى بكرة الخيط اخرها فين

دي شهادتي انا و اخويا على – اسماعيل وهبة – ١٧ سنة

في نفس الوقت كان فيه ٢ من ولاد عمتي في المشهد – أحمد الشعار ١٨ سنة – كان وسط المتظاهرين مع اسماعيل ، و محمود ٢٥ سنة كان معايا 

 و الشهادة دي خاصة جدا علشان كل واحد فينا كان في ناحية : اسماعيل كان و سط المتظاهرين و انا كنت باحاول اروح له العباسية علشان أخده على المستشفى بعد ما رأسه اتفتحت من طوبة .

ادي اللي حصل و اسماعيل يصحح لي او يزود ، و ربنا يشهد على كلامي :

حوالين الساعة ٣ مساء (رواية أهل المنطقة بعد كلامي معام بشكل شخصي) بدأت اشاعة في الانتشار في المنطقة بأن الناس  ،اللي جايين من التحرير دول جايين يكسروا المنطقة و جايين يدخلوا علي أهل المنطقة بيوتهم ، و طبعا اللي عمل كدة عناصر مندسة من البلطجية المأجورين اللي انا شفتهم بعيني و اتكلمت معاهم برده بعد كدة . 

بالتالي – اهالي العباسية كانوا سخنانين على اللي جايين عليهم من التحرير ، و كانوا شبه عاملين لجان شعبية

على الساعى ٣-٤ كدة المتظاهرين اتجهوا من ميدان التحرير للعباسية لوزارة الدفاع .

الجيش كان قافل الطريق من عند كوبري العباسية ناحية جامع النور و كمان قافل مدخل ميدان العباسية من الناحية التانية من الكوبري .

 المتظاهرين لما وصلوا اصتدموا بسخونة اهل العباسية و البلطجية المندسين بين الاهالي ، و انتدس فيهم من البلطجية المخربين اللي عملوا كام حركة تخريبية في المنطقة و سخنوا الاهالي عليهم اكتر – لاحظوا ان فيه بلطجية مندسين في الناحيتين دلوقتي و كله بيسخن كله .

بالتالي – حصل صدام بين المتظاهرين و البلطجية المندسين بين الأهالي و الأهالي اتجروا للصدام ده ، و بعد كدة البلطجية كانوا عمالين يولعوا فيها كمان و كمان ، و عمالين يجيبوا مولوتوف و طوب على براويطة من الحواري . شهادة بعض المتظاهرين ان كان فيه عساكر جيش وسط الاهالي في اول الأمر و بعد كدة بخ .

المهم ـ الكل بيضرب طوب و زجاجات على الكل و كل جهة فاكرة التانية بلطجية .

اسماعيل اخويا كان وسط المتظاهرين المحاصرين بين الجيش من ناحية و اهالي العباسية من ناحية . و أخد طوبة في دماغة فتحتها . فا  كلمني علشان اروح اجيبة من العباسية و راح على الاسعاف علشان يخيطوا دماغه ، و تمت الخياطة . لما رحت لاقيت مدخل العباسية من صلاح سالم مقفول بالشرطة العسكرية . اضطررت للتخريم من عند المستشفى الايطالي أو اليوناني لشارع السرايات و من الحواري وصلت لشارع كمال اللي عند مستشفى دار الشفاء .

طبعا تخيلي عن المشهد كان زي ما اسماعيل ما حاكيهولي – اللي هو منظور المتظاهرين – اللي هو ان فيه بلطجية عمالين يضربوا عليهم طوب و واقفين لهم عند مركز جراحة القلب في شارع امتداد رمسيس – قبل كلية الطب من ناحية شارع احمد سعيد . فا لما وصلت شارع كمال كنت فاكر الشوارع الجانبية متقفلة بالجيش او بالبلطجية . و لكني ذهلت ان ده ما كانش حاصل و مشيت في شارع كمال و عديت مستشفى دار الشفاء لحد شارع امتداد رمسيس ، و بعد كدة فضلت ماشي لحد ما لاقيت الناس – اللي المتظاهرين فاكرينهم بلطجية – متجمهرين و بيرموا طوب على المتظاهرين – اللي هم فاكرينهم عملاء و خونة و جايين  يكسروا عليهم بيوتهم وفي قول اخر بلطجية ، و لاقيت الامن المركزي عامل قدامهم حائط بشري علشان يحميهم من المتظاهرين – اللي المندسين من البلطجية الحقيقيين اقنعوهم انهم بلطجية .

وصلت لحد الامن و بصيت حواليا في وشوش الناس – لاقيتهم من اهالي العباسية و شبه الناس اللي انا شفتهم في جمعة الغضب . يعني من شعب مصر الكريم . و لاقيت فيه ناس وسطهم عمالين يسخنوهم . و لاقيت واحد عمال يزعق و يحدف طوب و شكله غلط شوية – قمت مسكته و قلت له انت بترمي طوب ليه ؟ قال لي دول عايزين يدخلوا عليا بيتي و يكسروا علينا عيشتنا !!!!

و واحد تاني عمال يقول “دول عملاء و خونة و عايزين يهدوا البلد” و الواد ده بالذات واحد جابه قدامي و سأله : ” انت منين اصلا علشان انا من هنا و ما اعرفكش ؟ ” قال له : “انا من ارض اللواء و جاي علشان الناس دي هايخربوا بيوتنا و علشان دول خونة !!!!” – لاحظوا الكلام اللي هو حافظة و شكلة برده كان غلط و يقترب من البلطجي . و خلونا نسميه عتريس علشان له واقعة ها تيجي كمان شوية معايا .

أيقتنت انا ساعتها الالتباس الفظيع عند الطرفين ، و ساعتها كلمت اخويا في التليفون و قلت له نط السور عند كلية الطب و اهرب من المكان ده علشان دي فتنة و مصريين بيضربوا مصريين و كله فاكر التاني بلطجي ، و روح اركب المترو و انزل في المعادي و انا هاروح اجيبك و نروح مستشفى نشوف الجرح بتاعك محتاج رعاية تانية ولا لأ .

 و فجأة الفتنة و الغباء اللي كان حاصل ده خلاني انتابتني نوبة هستريا زعيق في الناس – و فضلت ازعق لهم زي المجنون و أقول لهم : ” دول مش بلطجية !!! انا اخويا عنده ١٧ سنة وسطهم و ما خرجش من المدرسة لسه ؟؟؟ اخويا بلطجي ازاي يعني ؟؟؟ انتم فاكرينهم بلطجية و هم فاركينكم بلطجية !!! و انتم مصريين و هم مصريين و الجيش و الشرطة بتوقع بيننا و بين بعض !!!! و بيولعوها  اعلشان نضرب في بعض!!!! أخويا و اخو الراجل ده (اشارة لمحمود الشعار اللي كان واقف جنبي و اخوه مع اخويا وسط المتظاهرين) شباب في الجامعة عندهم ١٧ و ١٨ سنة !!! ازاي يبقوا بلطجية ؟؟؟” 

و محمود بدأ يزعق فيهم هو كمان و كان فيه ناس بتحاول تتكلم معاهم علشان يبطلوا ضرب .

بعد زعيق كتير و رغي كتير و محاولات كتير – فجأة بدأ صوت العقل يكبر في المنطقة ، و ناس تانية بدأت تتكلم مع الموجودين في الشارع علشان يوعوهم . و بعض الناس بدأت تهتف “سلمية سلمية” . و لكن كان فيه تخوف انهم لو بطلوا يضربوا هاينضربوا احلى ضرب و تدمير .

و غير كدة كان كل شوية المتظاهرين يقربوا و الأمن يفتح لهم في الحائط البشري ثغرة علشان يحصل مواجهة بين الجبهتين و العكس .

المهم ، صوت العقل استمر في الصعود لدرجة ان أحد اهالي المنطقة هتف بالشعار العبقري “الشعب و الشعب ايد واحدة” و بدأنا نردد وراه ، و الناس كلها بدأت تردد وراه .

و هنا بقى ظهر عتريس المندس قدامي و حاول يهتف ضد الهتاف العبقري ده و يقول “عباسية – دول بلطجية و عملاء” و لكن للأسف محاولات عتريس – و عرفت انه مندس ساعتها من الموقف ده زائد الموقف اللي قبله .

“الشعب و الشعب ايد واحدة – الهتاف بدأ يعلى جامد و الضرب بقى من المندسين بس ، و بعد كدة هدي ، و فجأة المندسين البلطجية اختفوا من الشارع .

و بعدهم على طول … قام الامن المركزي ضارب قنابل مسيلة للدموع و هرب من المشهد زي خروج باتمان وسط الدخان – كل ده و الهتاف شغال – الشعب و الشعب ايد واحدة .

و فجأة الضرب وقف تماماً .

و بقوا الناس كلها من الاهالي رافعين اياديهم لفوق و فاتحين كفوفهم دلالة على السلمية و بيهتفوا “سلمية” و ” الشعب و الشعب ايد واحدة” . و المتظاهرين كمان بدؤوا يقربوا و هم رافعين اديهم و كفوفهم بسلمية . 

فا مشينا انا و محمود تجاه المتظاهرين علشان يشوفوا اننا مش بلطجية – بالمناسبة انا كنت لابس شورت باجي و تي شرت و محمود كان لابس نظارة فريملس ، فا قلت غالبا لو شافونا عن قرب هايطمنوا – و لما وصلنا لهم الجموع من الجهتين إلتأموا و بقوا كلهم جمع واحد . و بيهتفوا “سلمية سلمية” – و بعد كدة الدنيا هديت على الاخر و اي نار و اي حريق اطفئ .

و بعد كدة مشينا من العباسية

يا ريت لو حد من الشباب عنده اضافة يقول لي .

خلص كلام شاهد العيان

و كفايه كده فيديوهات

و الان سؤال من شادى لولاد البلد

حسب التوقيت المحلى للثوره المصريه هل حان الان موعد اختيار قياده موحده للثوره

#Abbaseya #Egypt #Tahrir #NOSCAF #JAN25 #JUL23 #Massira #Masira

التحديث الأول لجمع شهادات من كانوا بالعباسيه سواء كانت مكتوبه أو فيديوهات

شهادة علاء عبد الفتاح

شهاده عالهوا فى صباح دريم مع دينا عبد الرحمن

بعد انسحاب البلطجيه و الأمن المركزى و الشعب المصرى يتقابل فيكون الهتاف الطبيعى

الشعب و الشعب أيد واحده

شهادة الشيخ حسنين–  امام  بوزارة الأوقاف —

الصوره دى ليست قرينة اتهام انما هى طلب للتحقيق

ماذا كانت تفعل الشرطه العسكريه فوق المبانى

نفس المبانى حسب الشهادات التى القيت منها زجاجات و حجاره على المسيره

التحديث الثانى

مدونة لسان حال تعرض اسباب القيام بالمسيره من خلال الاحداث بمختلف محافظات مصر و شهادات لما حدث بالمسيره طوال اليوم

برجاء الضغط هنا لقراءة ما جاء بمدونة لسان حال

2 Comments»

[…] أما مدونة اصحي يا بلدي فقد سجلت  شهادتها بالفيديوهات و الصور و يمكنكم رؤيتها بالضغط هنا […]

  shadyg wrote @

thx alot Asmaa


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

شخص ما يكتب

يكتب اليوم عن الأمس والغد ..

minawageh1's Blog

A great WordPress.com site

لسـان حال

بعض الشيء عن كل شيء © Asmaa Khairy

خيوط

من هوامش تفاؤل الإرادة

Bucket List Publications

Indulge- Travel, Adventure, & New Experiences

مصر هبة النيل

مصر يامه يا بهية يام طرحة وجلابية الزمان شاب وانتي شابه هو رايح وانتي جاية

The WordPress.com Blog

The latest news on WordPress.com and the WordPress community.

%d bloggers like this: