Shady EL-Balad اصحى يا بلد

مصر حتفضل غاليه عليا

انا و خالد سعيد


امبارح زى معظم الأيام نمت و حلمت

بس ده كان حلم مختلف فاكر معظم تفاصيله

قال ايه أنا فى خطوبتى و فى واحد جاى يسلم عليا من ورايا بيخبط على كتفى

الف مبروك يا شادى قمت أسلم عليه لفيت لقيت شكله مش غريب

خ خ خ خالد سعيد !!!!! بالأحضان يا حبايب يا حصان الثوره يا حلم و علم

يااااااااه انت جاى كل المشوار ده يا خالد عشان تباركلى

خالد : بتعمل ايه اليومين دول يا شادى

شادى : و الله يا خالد مش مظبط لا عارف أكتب ولا أعمل كليبات ولا حتى صور و حاسس ان فى كتير زى حالاتى

خالد : بسيطه يا شادى اكتب عن حكايتك معايا

مش انت بتفكر تعمل مدونه جديده بدل اللى ضاعت منك فى الزحمه يللا أعملها بسرعه و أكتب حكايتك معايا

شادى : و هى دى بسيطه  ما هو أ ….. أ أ خالد خالد

أختفى خالد و صحيت أنا و ظل يفكر و يفكر

بس خلاص كفايه تفكير

ما هو خالد قال لك “يا شادى أكتب عن حكايتك معايا” ما هى بسيطه اهى

طب قلم و ورقه ……. فاكس مفيش

ممممم طب كي بورد و تكييف و نسكافيه ….. ولا الدموع

يا خاااااااااااااااااالد

فاكر يا خالد أول مره سمعت فيها عنك كانت عربيتى بايظه زى اليومين دول بالظبط

و سألنى سواق التاكسى شفت حكاية الجدع اللى موتوه من الضرب فى اسكندريه

مين ده يا اسطى انا لسه صاحى خير

بيقولوا شاب قفشوه اتنين امناء شرطه معرفش ولا ظباط صورهم بيعملوا مصيبه باين دخلوا جابوه من نت كافيه و هاروه ضرب و مات

مااااااااات

ماشى فل كلام تاكسيات حبتين هجص و حبتين تلاته اربه حكم من سواقين التاكسى

وصلت الشغل فتحت النت

ده الكلام بجد يا رجاله

شاب !!!!!!!! أنا غالبا شاب

مصور فيديو مش عاجب الأمن !!!!!! أنا كمان بأصور فيديوهات مش عاجبه الأمن

قاعد على النت يحمل الفيديو !!!!! أنا كمان بأعمل كده

حشروله لفافة بانجو !!!!!! ده انا بوئى أوسع من إسماعيل ياسين يشيل تربة حشيش مرتاح

القسم رافض يعترف و بيهرب اللى ضربوه !!!!! طب فلينرجم عبد المأمور

ده أنا

لأ أسمه خالد سعيد

أنا خالد سعيد

يا ابنى كبر دماغك ده تسخين من البرادعى و ايمن نور بيركبوا موجة أحزان الشعب و بينفخوا فى النار عشان تولع و يركبوا

استغلال سياسى يعنى

لأ لأ لأ

أنا محدش يقدر يستغلنى أنا خالد سعيد

أنا خالد سعيد اللى صورت حاجه مش عاجبانى فى مصر

أنا خالد سعيد اللى نشرت اللى صورته عشان مصر كلها تعرفه

أنا خالد سعيد اللى بأنده على بلدى “أصحى يا بلد” ايوه انا

أنا خالد سعيد اللى اتضربت و محدش عرف يدافع عنى مش قلة شهامه ده احنا المصريين

مصريين !!!!!! انت لسه فاكر

أيوه أنا خالد سعيد و لسه فاكر ان احنا المصريين أنا المصرى انت مين

أنت مين عشان تضربنى لأنى بأحب بلدى

أنت مين عشان تقتلنى لأنى بأفكر فى بلدى

أنا شادى الغزاوى أنا خالد سعيد أنا المصرى اللى اتقلت

أيوه انا اتقتلت بس عمرى ما حأموت

و حافضل انده على البلد و بعلو صوتى “أصحى يا بلد” و حتصحى و حتشوف

و عمرك ما حتعرف امتى حتقوم عليك البلد

و هذه قلوبنا معاقل الحريه و هذه أجسادنا ذخائر القضيه

و نقسم سنبقى لأننا و أرضنا و الحق أكثريه

و لابد من يوم معلوم تترد فيه المظالم

أبيض على كل مظلوم أسود على كل ظالم

و أنا خالد سعيد ما ظلمتش حد

و أعلى ما خيلك و أمنك و مدرعاتك أركبه

و انا بموبايلى و لابتوبى حأوريك

بينا يا مصر نحيي الماضى بروح العصر

بينا يا مصر

أصحى يا بلد

صحيت البلد يا خالد

ازيك يا خالد

فاكر يا خالد أول صوره شوفتهالك

صوره لقيتها على النت و حاولت أوصل لسمير جرجس عشان أقوله انى حاعدل الصوره و حأنده على البلد “أصحى يا بلد” صحيت يا خالد

فاكر يا خالد كتبت و قلت ايه أول ما شفت صورتك

و فى وسط الظلام

مش حنسكت ولا ننام

ولا حنكتفى بالكلام

ده احنا ولاد البلد
اتكلم الولد

استغرب عبد المأمور

انضرب الولد

مات الولد

اصحى بقى يا بلد

الصوره دى يا خالد كانت أول تعامل غير مباشر مع أمن الدوله بتعليمات مباشره لواحد صديقى

من أمن الدوله اليكم يا عيال النت ” أتكلموا فى اللى أنتوا عايزينه اشتموا فى النظافه فى الكوره حتى فى المحافظ بالأسم و باهله بس خالد سعيد قضية أمن قومى ابعدوا أحسنلكم ” نعم؟؟؟؟

أنا خالد سعيد قضية أمن قومى

و التعليم مش أمن قومى

و كرامتى أنا المصرى مش أمن قومى

و الغاز اللى بيتصدر للعدو مش أمن قومى

و الزباله اللى أكتر من الاسفلت فى الشوارع مش أمن قومى

و ولاد البلد ولاد مصر ضربهم , سحلهم , قتلهم , شغلهم, سكنهم , صحتهم , إبتكاراتهم , فنهم , و دينهم و دين أهلهم مش أمن قومى

أنا المصرى أنا الأمن القومى

فاكر يا خالد الكليب ده

فاكر لما قعدت أنا و انت 11 يوم خارج نطاق الحياه متفرغين بنعمل فى الكليب

فاكر كام الف صوره اتفرجنا عليها

فاكر يوم ما الكليب نزل على النت حصل ايه

و فاكر كام تليفون جالى انا و اصحابى يقول لنا أمن الدوله بيسأل مين اللى عمل الكليب

تانى أمن الدوله طب خليهم يعيشوا

أيوه أنا خالد سعيد و ما سمعتش تحذيركم الأول بانى ابعد عن القضيه

ده انا أبن اللى قال فدائى فدائى

انا ابن اللى قال رايحين شايلين فى ايدنا سلاح راجعين شايلين رايات النصر

أيوه أنا المصرى و دلوقتى و انت بتسألوا عنى بأصور مزارع المانجو اللى بتتسقى من مية المصرف الصناعى و المجارى عشان واحد مسنود اشترى الأرض و ردم قنوات الرى

أيوه أنا خالد سعيد اللى عامل كليب عن مصر و شباب مصر و بيقول لرئيسها دى اخر فرصه يا حاج

ايوه يا خالد الرئيس اللى خلعناه هو احنالما نصحى حنفوق على امناء الشرطه ولا ايه

لأ دول كانوا سلمه فى الطريق لفوق

احنا المصريين بنجيب من الاخر

احنا المصريين عارفين  السلم بيتكنس من فوق و الهرم بيتبنى من تحت

بنكنس السلم يا خالد و مش حنسيب المقشات

و باذن الله حنبنى الهرم يا خالد

أيوه انا المصرى خـــــــالـــــــد

خالد

خالد

يا خااااااااااااااااااالد

يا الـــــــمـــــــصـــــــرى

عيش أنت خالد و سعيد

 

المتفائل

خالد سعيد

شادى الغزاوى

4 June 2011

1 Comment»

  محمد الغزاوي wrote @

حقيقي انت متفائل وانا تجري دموع الفرح والالم من عيني.
رحم الله شهداءنا.
واعان الشعب علي القادم .
تحية اليك ايها الابن الغالي وكم اتوق ان احتضنك.
محمد


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

شخص ما يكتب

يكتب اليوم عن الأمس والغد ..

minawageh1's Blog

A great WordPress.com site

لسـان حال

بعض الشيء عن كل شيء © Asmaa Khairy

خيوط

من هوامش تفاؤل الإرادة

Bucket List Publications

Indulge- Travel, Adventure, & New Experiences

مصر هبة النيل

مصر يامه يا بهية يام طرحة وجلابية الزمان شاب وانتي شابه هو رايح وانتي جاية

The WordPress.com Blog

The latest news on WordPress.com and the WordPress community.

%d bloggers like this: