Shady EL-Balad اصحى يا بلد

مصر حتفضل غاليه عليا

Archive for افتكاساتى فى الشعر

رايح فين يا حسين


ما تستغربوش

اصل انتوا ما تعرفوش

ولا تعرفوهوش

ولا حتى انا لحقت

هو اللي انا مصدق إنه خالي أكيد

و حافضل مستنيه يعدي علينا في البيت

قالوا لي النهارده “ده راح” اول ما صحيت

رايح فين يا حسين !!!

رايح فين يا جدع,,,هو انت لسه جيت ؟؟؟

 

هو بابتسامته اول حد بافتكره أول ما اشوف الجيتار

هو اول اسم بيتكتب على سابورة عقلي

مع دخان كل صاروخ يفرقع و ناس تجري بتضحك

وحشاني مقالبه من غير رعب ولا تهزيق يولد تار

و تنطيط نبض قلبي مع شقلباته ع الأوتار

 

هو اللي بافتكره و اتبسم

مع كل تانيه لرجل البنطلون الجينز

مع كل تشميره للقميص

مع كل بـُـرنيطه تعجبني و ماتجيش مقاسي

مع كل بدله فخمه و مجنونه

هو كل بالطو عجيب غريب شيك

هو السارح عكس إتجاه الموضه

هو الجلابيه بقماش البيرمودا

 

هو اللي كتبت كلام ما نشرتوش و انا سامعه بصوته بيغنيه

قلت يمكن في يوم يعدي ولا ألاقيه

و يقول ده جدا جدا وحش بس يللا نغنيه

 

هو الامريكاني اللي عرفني بلاويها

هو الجـَشـِع الرأسمالي بياع كل حاجه من حبه فيها

هو مش أضواء نيون الإعلانات

بس هو كل الحاجات و الراديوهات

 

هو اللي اتمنيت اكون زيه

هو اللي خفت لأكون زيه

هو جنان التمانينات

هو حلم التسعينات

و الحلم ما ينفعش يتقال إنه مات

 

هو اللي باستناه شهور

عشان استناه كل يوم

و كإنه عشق تاه

باب باراب باراب بااا باااه

 

هو احلى حاجة في اكتر فيلم شوفته في حياتي

هو اللي قال لي “خليك شيطان و إلبس ملاك”

هو اللي غناهالي بصوت بيغمزلي عشان ما اعملهاش

هو اللي انا شايفه قصادي و مجنني طول البعاد

 

أنا في اللابوريا

و هو لسه قادر في الحزن يفرح

هيييييييييييييييييييييييييييييييييه

 

هو حتعرفوه في يوم من الأيام

يمكن في يوم بسبعين الف عام

هو؟؟؟

هو #حسين_الإمام

 

18-مايو-2014

Hussien el-emam Cover

في #مصر ::: رصاصتين كفايه,, #شعر


رصاصتين كفايه

دي صابتني و التانيه فاتت

و بعد الحاجز رُزِقَت وصابت

 

رصاصه مش مني صابتهم

و اختها مش منه صابتني

وطلعنا رحله في إسعافهم

 

طول دقني ظبتطني

و الحظاظه ضيعتني

و لأني مش من اعوانهم

ع المشرحه بناصيه حدفني

لقيت رفيقـُـه إللي قتلني

برصاص كفيف صابه و صابني

و زحلقونا على تروللي

مات مِـني الغل و بقى خـِـلٍِـي

 

قعدنا ع الغـُسل نتعازم

اتفضل يا شهيد والله ما يحصلشي

لا ده انت ع يمين التروللي

لا انا معكوس

انت ع القبله دوغري

 

طب دبرني يا خـِـلٍِـي

مين دوره ع التروللي

سيبك انت و احضنني

و اهو قبرك هو قبري

و انا ضامن حنية أهلي

ما حيفرقوا حضن الشهيدين

 

بأنادي و انتوا ولا سامعين

يا أهلي افتكروا وصيتنا

تشريحنا حق عيال جيلنا

ولا دمعه ولا صوت ولا تار بالعين

و جنازه تخلص بزغروطتين

 

حدفونا لأجل اتنين واردين

رصاصه ولا رصاصتين

و اهو إتصاحبوا تاني الاتنين

بسؤال آجل

يعني انا اتقتلت و انا القاتل!!؟؟

 

يا خللي بلا تار بلا قاتل

بدم دبحنا أمي صابحه حامل

 

و يجيلنا بكره و يتسائل

يعني انا اتقتلت و انا القاتل!!؟؟

 

28/7/2013

المتفائل الفاني

شادي الغزاوي

#شادي_البلد

facebook.com/SOoOti.eYes

يا #مصر “ها المدينه شبعت”


ها المدينه شبعت مباني،
ها المدينه بدها أماني,
ها المدينه شبعت نداله،
ها المدينه بدها عداله,
ها المدينه شبعت تفحيط،
ها المدينه بدها تخطيط,
ها المدينه شبعت مناوره,
ها المدينه بدها ثوره,

احمي براحتك ها المباني
و ادهس بجهلك ها الأماني
اكتئبنا و بيقتلنا الأمل الأكيد
ثوره حتبدأ وظلمك لابد فاني

14,18 March 2013

الصوره من اشتباكات محمد محمود
للاسف مش عارف مين مصورها
يا ريت لو حد يعرف يقول لي

photo by: Hossam EL-Hamalawy

original photo: http://www.flickr.com/photos/elhamalawy/6386894315/in/set-72157628195422489

المتفائل الفاني

شادي الغزاوي

من وحي عبقريات أمين حداد و اخر ليالي رمضان @AminFHaddad


من وحي عبقريات أمين حداد و اخر ليالي رمضان

—(( @AminFHaddad – Amin Haddad – أمين حداد ))—

صوت الشهدا ادان الفجر,
“اخر” فجر بيقولك اصحى,
ده اسامينا حبات السبحه,
عِد صوابعك على اسامينا,
خالد احمد ماجد مينا

و كمل عَد و عَد

عِد قلوب و عِد عِيون

عِد عدد الأمل المقبور
عِد الوعود المتلفقه
عِد الصدور المتكهربه
وكمل عَد و عَد

ده وعدك
لما يحصلك فجرك
و اسمك على كتفك و كفك
و يـومـهـا واحد تاني حيصحى
يعد اسمك في حبات السبحه
و يكمل عَد ,,,, و عَد ,,,, و عَد

المتفائل الفاني

شادي الغزاوي

17Aug2012

الصوره من محمد محمود

22 نوفمبر 2012

‎#RIPGalalAmer فى رثاء جلال عامر


يا عم جلااااااااااااااال ما لسه بدرى

يا عم جلااااااال ده احنا لسه بنحبى

يا عم جلاااااال يا عم جلااااااااااااال

يا عم جلال نضحك ولا نبكى

انا مش ناوى ابكى

ولو حتى البسمه بفلوس

مابقاش فى دموع تحكى

نضحك ولا نبكى

عالجبانه و قبلها جنازه و قبلهم استــبــالــيـــا
هى خـــلاص بقت كــده ولا ايه يـــــا دنـــيـــا

فاكرينك مدرسه و انتى ولا الـهـدمه الــبالـيه
و حياة دناوتك ما حـتـنـسيـنـى انك فساكونيا

لا حأكفر ولا حاترهـبـن ولا ليكى حكم علـيــا
يا محـطه يا مغبره حاعيشك صــح يا فــانـيـه

نضحك ولا نبكى

مابقاش فى دموع تحكى

ولو حتى البسمه بفلوس

انا مش ناوى ابكى
© © © © © © © © © © © © ©

رحمة الله عليك يا عم جلال

اللهم ارحمه بحق كل كلمة حق قالها

وبحق كل كلمه ابكتنا من فرط سخريتها

المتفائل الفانى

شادى الغزاوى

12/Feb/2012

انا مش صلاح جاهين


انا مش صلاح جاهين
ولا انا يوسف شاهين
انا واحد من المصريين
سافف طين طمي النيل

انا مش فؤاد حداد
ولا أنا فرعون جماد
و زهقت أعيش إخماد
لحرايق صنعها عِباد

ما حرقتش انا اتحرقت
ما قتلتش انا اتقتلت
و ما بعتش انا اللى إتبعت
ولا قلشتش بس إتقلشت

ما ضعفتش لأ انا قويت
ما هدمتش لأ أنا بنيت
و حلمت كتير و ياريت
لا حاولت ولا إتمنيت

ندهت و قلت اصحى يا بلد
طب أنا مسئول عن موت الولد؟
لأ ده حلمه بأيد غيرى اتوئد
وبقى منه تهمه و عدد

قاتلت و عملت اللى أقدر عليه
ولا ناوى ارجع للى كنت فيه
بس هى شكلها كده ناويه
تسلم عليا و تصبر عليه

و صبرك ده أخره ايه يا ست
يا اللى نزلتيهم ف لحد ورا لحد
طب ندهتى ليه للواد و البت
لما انتى حتتفرجى ع المدح و التيت

عارفك لا غروره ولا كدابه
بس انتى صايعه و نصابه
ع اللى يتكبر فوق مقامه
قبره جاهز و انتى …ا!ا

ولا أنا مالى خلينى ف حالى
يمكن تمشى ف يوم عن بالى
و تطلعى خالص من خيالى
بس انا عارف ده يوم النهائى

نهائى بيقربلى يوم ورا يوم
حيحصلى و مبقاش أنا المكلوم
يا ترى جايلى أرق ولا نوم
ولا شفا من نفس مسموم

المهم حأكون ارتحت منك
ولا برضك حأشيل همك
و انا مالى بس بألمك؟
غير انى …….اتـخـلـقـت بـحـبـك

المتفائل الفانى

شادى الغزاوى

ولاد البلد


ولاد البلد؟؟؟؟

اه انتوا كلكم

حد معترض

اعترض براحتك

ولا تكون لغيرك ناكر

و ان حسبتونى معاكم

حأكون ليكم شاكر

العواف

شخص ما يكتب

يكتب اليوم عن الأمس والغد ..

minawageh1's Blog

A great WordPress.com site

لسـان حال

بعض الشيء عن كل شيء © Asmaa Khairy

خيوط

من هوامش تفاؤل الإرادة

Bucket List Publications

Indulge- Travel, Adventure, & New Experiences

مصر هبة النيل

مصر يامه يا بهية يام طرحة وجلابية الزمان شاب وانتي شابه هو رايح وانتي جاية

WordPress.com News

The latest news on WordPress.com and the WordPress community.

Follow

Get every new post delivered to your Inbox.

Join 1,944 other followers

%d bloggers like this: