Shady EL-Balad اصحى يا بلد
مصر حتفضل غاليه علياولاد البلد
ولاد البلد؟؟؟؟
اه انتوا كلكم
حد معترض
اعترض براحتك
ولا تكون لغيرك ناكر
و ان حسبتونى معاكم
حأكون ليكم شاكر
العواف
يا #مصر … أين الشعب …؟
ده مقال من 2008 أُعيد نشره من كتر ما باسمع السؤال ده دلوقتي زي ايام ماكتبته
ما اكثر الاوضاع التى نــنــتــقدها يوميا
و ما اكثر النقد الذى نستمع اليه يوميا
و لكن اين التغيير؟؟؟
هل ستتحسن الأوضاع من تلقاء نفسها؟؟؟
اين الشعب؟؟؟
تتحدث الحكومه عن التغيير…….جميل
تطالب الاحزاب المختلفه بالتغير……رائع
الحق يا جدع فى حراك فى الشارع المصرى من اجل التغيير…..فين ده!!!!!!هاه؟
قد تتغير الحكومه و الحكام و الاحزاب و الحزبيين و رؤساء الحركات السياسيه و اسماء الحركات و الاحزاب
و لكن
الحال لا يتغير
و السؤال اين الشعب
على مدار التاريخ المصرى كم من المرات هب الشعب فى حركات جامحه للتغيير
أراها -ع قدر علمي- قليله
فنحن شعب اعتاد التأقلم على كل الأوضاع طالما النيل يجرى
هل هى حالة عدوى من النهر لطول فترة هدوئه
ام هى حالة خوف من جبروت النهر فى فترات فيضانه
من المعروف انه قديما كانت تنشأ الحضارات على ضفاف الانهار
و نهر النيل سبب نشأة الحضاره و قيام الدوله المصريه الفرعونيه و ما تبعها
فهل تأثرنا به و اصابتنا عدوى هدوئه الطويل ام نخاف من الفوضى العارمه التى
يسببها فيضانه
ولا هى الحكايه ان احنا مبسوطين كده
بمبدأ لا تعاتبنى ولا اعاتبك ده الهم طايلنى و طايلك
و لكننى هنا لا اعاتب فانا معجب اشد الاعجاب بالشعب المصرى و قدرته العجيبه على التأقلم و فى نفس الوقت قدرته على رفض اى تغيير لهويته
المصريون تاقلموا مع الفيضان و لكن لم يتأقلموا مع الغزاه
تعلموا لغة المحتل و لكن لم تتغير لغتهم العربيه العاميه المصريه
تأقلموا مع قوة المحتل و لكن لم يتخلوا عن حلم المقاومه
تأقلموا مع ضعف مقاومتهم و لكن لم يرضخوا لقوة المغتصب
اصاب بعضهم مرض الخيانه و لكن ابدا لم تستشرى فيهم العدوى
حاله غريبه
هلى هى استمرار لحالة السكون فى انتظار الفيضان؟؟
إجابتي:؟
نعم هو كذلك
ولكنه لن يكون فيضان قادم علينا,,,بل “نحن القادمون كما الطوفان” نعم نحن
مش مصدق؟؟؟؟؟ طب إسأل أهل المحله
و إن كنت أنا اتحرك الان….أو سأتحرك غداً…فحين تبدأ انت في التحرك معي أو بعدي و يا سلام لو قبلي
وقتها سنعلم إجابة السؤال
سؤال:: أين الشعب؟؟؟؟
إجابته:: اتحرك يا عزيزي “الدوق” اتحرك
و إن كنت تتسائل عن الطوفان ,,,,فلتستمع للاجابه من عم صلاح جاهين
▼△▼ ▼△▼ ▼△▼ ▼△▼
بعد الطوفان نلقى الصديق الزين
نـتـسـنـدوا على بعض بالـكـتـفين
ونقول دا واللة حرام
ما نبتديش العلام غير بالطوفان
يعني
لازم طوفان لازم طوفان.. طوفان
▼△▼ ▼△▼ ▼△▼ ▼△▼
و إن كنت تتسائل عن ما قبل و بعد الطوفان ,,,,فلتستمع للاجابه من عمنا زين العابدين فؤاد
▼△▼ ▼△▼ ▼△▼ ▼△▼
مهما يطول السجن مهما القهر ..
مهما يزيد الفجر بالسجّانة
مين اللى يقدر ساعة يحبس مصر .. ؟!!
▼△▼ ▼△▼ ▼△▼ ▼△▼
المتفائل الفاني
شادي الغزاوي
30-يوليو-2008
اسماعيل هنيه و هاشتاج #إسأل_الرئيس_مرسي
فوجئ متابعي الحساب الرسمي لرئيس الوزراء الفلسطيني (المقال المستمر) إسماعيل هنيه بانه يعيد نشر الأسئله من هاشتاج #إسأل_الرئيس_مرسي
و بعد دقائق نشر تغريده بأن حسابه كان قد تم الاستيلاء عليه و انه قد إستعاده مرة اخرى
ثم قام بمسح كل التغريدات التي كانت قد نشرت على حسابه من الهاشتاج الخاص باسئلة #مرسي
يا #مصر “ها المدينه شبعت”
ها المدينه شبعت مباني،
ها المدينه بدها أماني,
ها المدينه شبعت نداله،
ها المدينه بدها عداله,
ها المدينه شبعت تفحيط،
ها المدينه بدها تخطيط,
ها المدينه شبعت مناوره,
ها المدينه بدها ثوره,
احمي براحتك ها المباني
و ادهس بجهلك ها الأماني
اكتئبنا و بيقتلنا الأمل الأكيد
ثوره حتبدأ وظلمك لابد فاني
14,18 March 2013
الصوره من اشتباكات محمد محمود
للاسف مش عارف مين مصورها
يا ريت لو حد يعرف يقول لي
photo by: Hossam EL-Hamalawy
original photo: http://www.flickr.com/photos/elhamalawy/6386894315/in/set-72157628195422489
المتفائل الفاني
شادي الغزاوي
مش مهم … أنا ورقي سليم يا #مصر
الروح اتلوثت!!! …مش مهم … أنا ورقي سليم
المايه اختفت!!! …مش مهم … أنا ورقي سليم
الورقه اتحرقت!!! …مش مهم … أنا ورقي سليم
الكلمه اتيتمت!!! …مش مهم … أنا ورقي سليم
الفرحه اتدشملت!!! …مش مهم … أنا ورقي سليم
القضيه اتلفقت!!! …مش مهم … أنا ورقي سليم
المانجه باظت!!! …مش مهم … أنا ورقي سليم
الطينه اتجرفت!!! …مش مهم … أنا ورقي سليم
الشوارع ضلمت!!! …مش مهم … أنا ورقي سليم
العبارات غرقت!!! …مش مهم … أنا ورقي سليم
غازك اتسرق!!! …مش مهم … أنا ورقي سليم
المشجعين اتقتلوا!!! …مش مهم … أنا ورقي سليم
الاثار اتسرقت!!! …مش مهم … أنا ورقي سليم
المسرح اتحرق!!! …مش مهم … أنا ورقي سليم
احتلوا العراق!!!! …مش مهم … أنا ورقي سليم
ضربوا السودان!!! …مش مهم … أنا ورقي سليم
اتسرطن اللبن!!! …مش مهم … أنا ورقي سليم
اتسلقت البقره!!! …مش مهم … أنا ورقي سليم
الصلاحيه فاتت!!! …مش مهم … أنا ورقي سليم
حتموت؟ حتنفجر؟ حتنتحر؟ حتتشقلب؟ …مش مهم …
………………..انا اتقتلت
……………….و انا ورقي سليم………………………..
المتفائل الفاني
شادي الغزاوي
الفكر الفردى ….. و #مصر
لاننا بلد الافكار الفرديه
ذاكر لوحدك
غنى لوحدك
العب لوحدك
حليم هو المطرب الاوحد
عبد الوهاب هو الملحن الوحيد
ارضك لوحدك
ازرع لوحدك
فطبيعى جدا نوصل لمرحلة أحكم لوحدك
فى بلد الافكار الفرديه التى كانت بلد الحضاره الجماعيه
و الفكر الفردى يؤدى فى النهايه الى مصائب تعم على العامه لأن الفكر الفردى لا يمكن بطبيعته البشريه ان يراعى كل ما يتمناه البشر .
و المسئول بطبيعة موقعه يجب ان يراعى كل ما و من يقع فى نطاق مسئوليته ولكنه بما اعتاد عليه من افكار فرديه لا يستطيع ذلك .
و لذلك نجد المسئولين يتخذون قرارات خارج نطاق ما نتمنى و ما نحلم به و بعيده كل البعد عن ما نراه فى نطاق مصلحتنا .
و يمكننا القياس على ذلك فى كل القرارات واليكم بعض الامثله:
تغيير نمط البناء داخل المدينه هل تم قبله دراسه لامكانيات المدينه لاستيعاب مثل هذا التضخم السكانى هل تستوعب شوارع المدينه التى اقيمت منذ سنين طويله حجم التضخم المرورى الناتج عن ذلك التغيير فى النمط من 5 ادوار على الاكثر الى هذه الابراج المرتفعه
نتفسح في شوية امثله؟؟
في اسماعيليه عندما نجد برج سكنى شاهق فى الثلاثينى او فى السلطان حسين او فى المحطه الجديده او ما يشابههم من المناطق هل قام من اعطى التصريح بذلك المبنى بالاجابه على سؤال بسيط جدا
اللى حيسكنوا فى العماره دى عندهم كام عربيه و حيركنوا فين؟؟؟
في الفيوم مين بقاله سنين بياخد قرارات تطهق الفلاحين في عيشتهم و اصبحت محافظه طارده لأهلها
هو تماما نفس الفكر الذى اتخذ قرار بانشاء مدن سكنيه على طريق الاسكندريه الصحراوى دون توفير بدائل مروريه
و اضاف اليها القريه الذكيه بما تحتويه من الاف الموظفين و العمال حد سأل هما ساكنين فين؟؟
هو تماما نفس الفكر الذى اتخذ قرار بتحويل الاتجاهات المروريه من شوارع تتسع الى اربع حارات الى شارع يستوعب سياره واحده فتوقف الشارع الاول فى انتظار الثانى
و يتعطل محور لبنان و الدائرى المتسع لست حارات و احيانا اكتر لأنه ينتهى بحاره واحده عند منزل اسكندريه الصحراوى
و السبب فى ضيق الكوبرى ايه يا ترى ؟؟؟؟؟ عماره مبنيه هناك
يعنى تم استقطاع فدادين من اراضى زراعيه لاستكمال الدائرى و محدش عرف يتفاهم مع صاحب العماره و السكان ولا يوجد لهم بديل
طريق الفيوم الصحراوي اللي اضيق من شوارع داخل المدينه مين صرح بوجود مدن سكنيه على جانبيه دون وجود حتى إضاءه للطريق و مش حنتكلم عن عدم وجود اي نوع من الخدمات ع الطريق بس ع الاقل يكون الطريق منور
فهل تمت دراسة تلك القرارات بطريقه جماعيه ؟؟؟
ما اظنش (((( و الله اعلم )))) ان السؤال خطر على بال متخذ القرار اصلا لأنه هكذا يكون الفكر الفردى
انا موظف و الورق سليم و المحافظه سامحه بارتفاعات عادى يبقى انا فى الامان
اه انت (((( انا )))) و هو ده الفكر الفردى
و المشكله مش فى الموظف انما مين اللى قال فى المحافظه ان البلد تحتمل بناء ابراج؟؟؟
مين اللى قال ان التوفير فى اللمبات الموفره عديمة الاضاءه؟؟
و مين اللى قال ان زيادة التوفير عامود اه و عامود لأ ؟؟؟
و مين اللى قال الشارع ده يتسفلت دلوقتى حالا؟؟؟
و مين اللى قال تانى يوم نحفر نفس الشارع عشان البلاعات او الغاز او مواسير المياه؟؟؟
اللى قال هو “الفكر الفردى” و حين تجتمع السلطه مع الفكر الفردى تكون النتيجه سلطة طحينه
المتفائل الفاني
شادي الغزاوي
Nile,,,,,Cairo,,,,EL-Me7war,,,,,Pollution,,,,Green Beauty
لينك المقال الأصلي لي
http://tinyurl.com/9hkepgw
ترشيد استهلاك المياه … من جمال الغندور الى حزب الناتو
ايوه نقطة الماء حياه
انما ما هى حالة شبكات المياه فى المدينه و ما هو كم الهدر فى الشبكه العموميه قبل ان تصل الى المنازل؟؟
قبل ان نفكر فى توفير المياه من جراء الاستهلاك الزائد و الخاطئ يجب ان نفكر ماذا يحدث عندما تحدث مشكله فى مواسير المياه
يا ترى لسه عندنا سباكين صنايعيه زى زمان ولا كله بقى متعلمها عالسريع و هات يا مواسير بلاستيك مضروبه و ركب و اقبض و اجرى
حتقولولى دى مش مشكلة المحافظ لأ اسف دى مشكلته
غياب العامل و الصنايعى الماهر ازمه قوميه و الازمات القوميه مسئولية الحكومه و ممثل الحكومه فى المحافظه هو المحافظ
مين اللى بيسمح ان مواسير مياه غير مطابقه للمواصفات تبقى موجوده فى السوق , مش ده نتيجه لعدم وجود مراقبه للاسواق
و مين اللى حيراقب الاسواق الحكومه ولا جمال الغندور
مين اللى مطهق كل الصنايعيه مش الصوره المتخلفه اللى دايما بتصورهم فيها الافلام و المسلسلات طوال الاعوام الماضيه و حتى الان .
قارنوا بين افلامنا قبل و بعد الانفتاح و كيف تغيرت صورة الصنايعى و العامل من انسان منتج عضو فاعل فى المجتمع الى كائن هامشى يكون وجوده فى الفيلم فقط للتهكم
حتقولولى و الحكومه مالها حاقولكم هو مين اللى بيصرح بمثل هذه النماذج فى كل الافلام و المسلسلات مش الرقابه على المصنفات الفنيه التابعه للدوله ولا حزب الناتو
و النتيجه اختفى الصنايعى لأن الناس بقت مكسوفه تكون دى شغلتها و العائلات طبعا رافضين ان اولادهم يكونوا سباكين او نجارين او ميكانيكى و سلمولى على توفير المياه فى مواسير مش لاقيه صنايعى متخصص يعرف يصلحها بجد مش تلصيم
رجاء لكل ولاد البلد لو ابنك او اخوك او قريبك طموحه انه يبقى سباك او ميكانيكى او نجار او حتى بيسن السكاكين شجعه و اوعى تقف فى طريقه حنعمل ايه يعنى ب 80 مليون مهندس و دكتور و محاسب ولا حتى عالم ذره من غير سباك
كتبت المقال ده بعد ما تفتق ذهن محافظ اسماعيليه المخلوع من محافظتين في يوم واحد انه يقطع المياه فترات عن المحافظه كلها لتوفير المياه
اما عن حكاية ازاي خلعناه من محافظتين في يوم واحد فحنتكلم سوا سوا في الموضوع ده لاحقا
لينك مقالي الاصلي
Tuesday, May 25, 2010 at 6:07pm ·
من ولاد البلد,,لحكومه و احزاب زائله,,فى بلد باقيه,,وشعب بيده المفاتيح
الحدوته اننا شباب اتربى كويس اوى
شباب عارف قيمة بلده أوى
شباب بيحب بلده بنضافه أوى
اهالينا اتعذبوا عشان يربونا
شفناهم اد ايه بتنازلوا عن حقوق ليهم عشان نعيش و يعيشونا
الحدوته ان ده مش حيحصل تانى
حقوق اهالينا اللى اتبهدلوا فى دنيا البلد حترجع
احلامنا اللى اتأجلت و اللى اتدفنت واللى تخلينا عنا لأجل نعيش حنحققها
ولادنا و احفادنا مش حيشوفوا ذل ولا قهر تانى
سهل جدا اننا نتخلى عن احترامنا و تربيتنا و ناخد حقنا بايدينا بلطجه
بس لأ……..لأ……….لأ
احنا اخترنا الطريق الصعب,,,,,,طريق الاحترام
الطريق السلمى جدا
طريق قد يراه من يهاجمنا انه طريق الضعيف المدافع
بس لأ……لأ…..لأ
ده طريق القوى الواثق الصامد المؤمن بالله و بوطنه
نعم,,,,,,نحن أقوياء بوحدتنا صف واحد
نعم,,,,,نحن واثقون فى اخلاص نوايانا
نعم,,,,نحن صامدون متمسكون بمبادئنا
نعم,,,,نحن نؤمن بان الدين لله و الوطن للجميع
بس لأ مش حنتخلى عن احلامنا
و حقوقنا و حقوق أهالينا و احلام ولادنا و احفادنا حترجع بايدينا
بايدينا و احنا بنشتغل سوا
بايدينا و احنا بنسمع بعض
بايدينا و احنا مخلصين لوجه الله تعالى لأجل البلد
جيل جديد عنيد مافيهوش عبيد,,مش عايز غير حقوقه و حقوق اهله اللى ربوه و حقوق ولادنا و احفادنا انهم يحلموا
و الان
يا ايتها الحكومه الزائله لا محاله ,,,,, يا حتتغيروا يا حتموتوا عادى ده مش تهديد بالخلع يعنى
اسمعوا
كيف تطلبون من الشعب ان يقوم بإدارة عجلة الانتاج و همه الأول و الأخير منذ 10 شهور تأمين نفسه و أهله و ممتلكاته و ممتلكات الدوله فوق البيعه كمان.
ايتها الحكومه الزائله فى يوم لا محاله و ان طال انتظار ذلك اليوم فلتقوموا بما هو واجب عليكم كما تطالبون الشعب ان يقوم بما هو واجب عليه.
و يا ريت فى السريع كده تجاوبونا ع الأسئله دى
مين اللى حمى المتحف المصرى ؟؟؟؟
مين اللى حمى بيتونا بعد28يناير؟؟؟
مين اللى بيحمى ميادين التحرير بطول الجمهوريه و عرضها فى المظاهرات؟؟؟
مين اللى بيشتغل؟؟؟
مين اللى بيطالب و محدش بيجيب مطالبه ولا حتى بيسمعه؟؟؟
مينن اللى بيتضرب و يتسحل وهو يطالب بحرية ان يعبر عن رأيه؟؟؟
مين اللى ظالم فينا مين مظلوم؟؟؟
مين اللى مدبوح بالألم؟؟؟
مين اللى ما يعرفش غير كلمة نعم؟؟؟
يا حكام مصر المكبوته ,,,,,, هى دى الحدوته
يا ايتها الاحزاب و التيارات و الجماعات و المرشحين و السياسيين و الراشقين ف التليفزيونات
بذمتكم انتوا بتعملوا ايه غير انكم بتهجصوا على الشعب
تتفاوضون مع عمر سليمان ثم تنضمون إلى الميدان ثم تنادون بالرحيل من أجل الانتاج ثم تتفرقون فى احزاب اكثر ثم تتفاوضون مع الحكام الحاليين ثم توافقون ثم تقومون بنقض الموافقه ثم تتفاوضون ثم تتفاوضون ثم تتفاوضون
احب أقولكم ان الشعب بيقول لكم حموكوا فى كنكه
اتفاوضوا براحتكم و اتفلقوا
عملتوا ايه للشعب غير يفط و إعلانات تليفزيون و راديو و نت و ورق و كرتون
و مفيش مانع من شوية لحمه باسعار مخفه و يمكن بالتقسيط
اليفط اتكلفت كام؟؟؟؟قرى ريف مصر مش محتاجه فلوسكم يتعمل بيها صرف صحى مثلا؟؟؟
اعلانات التليفزيون اتكلفت كام؟؟؟؟؟الارامل و اصحاب العاهات مش يتعمل لهم أكشاك بدل ما يشحتوا مثا؟؟
اللحمه الرخيصه دى بتجيبوها منين؟؟؟؟ و بتبيعوها بالاسعار دى ازاى؟؟؟؟ ولـــــــــيــــــــه؟؟؟؟
طب ما تدعموا الحكومه فى دعم كل السلع الاساسيه… اه نسيت ده مش حيجيبلكم أصوات
فرحانين اوى و عايزين تدخلوا مجلس الشعب…. برافو
تعرف تحسب 7 فى8 بكام؟؟؟……..حتناقش الموازنه ازاى؟؟؟
تعرف تعرب جملتين على بعض و تشكلهم بالعربى الفصي؟؟؟….حتناقش صياغة القوانين ازاى؟؟؟؟
يا ايتها الاحزاب و التيارات و الجماعات و المرشحين و السياسيين و الراشقين ف التليفزيونات
انتم ايضا زائلون لا محاله
إن كنتم تطمعون فى كعكه مصريه يا ريت تعرفوا ان التورته لسه ما دخلتش الفرن
و كل اللى بيعمله الشعب المصرى حتى الان ,,,,,,,,, انه بيضرب فى البيض
لأ ما تجيبوش فانيليا ولا كيس دقيق هديه التورته دى للشعب المصرى
لما يخلص ضرب البيض ,,,,, حيقعد مع بعضه و يطفى النور و يغنى مع بعضه,,,, مصر حلوه يا جميل
و ياكل و يشرب كوبايتين شاى صعيدى
و أكيد حنقول نكت
بس أكيد مش حنقول مان فى مره واحد صعيدى
حنقول كان فى مره واحد مشتاق
بتجمعنا و وحدتنا حنقدر يا مصريين
و اخيرا
يا شعب يا واقف على باب النهار
يا اللى قربت بصمودك طريق الانتصار
و زرعت بتماسكك من تانى الأمل فى كل دار
فلتعلم ان طريق الجهاد من أجل الحقوق طويل
و كما قال صلاح جاهين
العدل عنيد..وبابه حديد..تفتحه إيدين الجدعان
وقـال:يا بـلد،عاهـدينى ع الصـبر والجلد.
قالـت له البــلد : كـفك يــابو الشــجعان!؟
و كما قال مجدى النجار
::::مــــــــصـــــــر قــــالـــت::::
انحيازى عمره ما كان لأنتهازى
مستحيل حأقبل تعازى
فى الشهيد رغم اعتزازى
إلا من بعد الحساب
و الحساب دلوقتى مفاتيحه فى يد الشعب
المظاهرات مفتاح
و الانتخابات مفتاح
شيلوا المفتاحين فى ايديكم
تظاهروا :::: صح
::::::: و :::::::
انتخبوا :::: صح
انزلوا قولوا رأيكم فى مظاهرات منظمه سلميه بعيدا عن المبانى العامه
صوتكم ضغط فى الميدان حيوصل صح
صوتكم ضغط امام المديريه حيوصل غلط
اليوم تعلم المصريون الدرس و اعتصموا فى ميدان التحرير دون غلق مجمع التحرير
تعلموا ان من افتى عليهم بذلك الفعل هو مغرض او لم يفكر فى العواقب رغم حسن نواياه
فنتعلم جميعا الدرس
لنكن وحده واحده مصريه صلبه واثقه تدافع عن ثورتها و عن ممتلكات وطنها
و تقطع الطريق على أى مغرض أو متهور أو حسن النيه و لم يفكر
و كمان
انزلوا قولوا رأيكم فى الانتخابات حتى الان لم يعلن انه هناك حتى تفكير فى تأجيل الانتخابات
الانتخابات دى فرصه
فرصه لبكره
فرصه لينا و فرصه لاحلام شعب
انزلوا و شاركوا بصوتكم و اختاروا اللى يمثل افكاركم
ما تخليش حد يوريك بعينيه ,,, انزل و شوف انت بعينيك انت
و احكم بعقلك انت
و حط معايير لنفسك
اختار اللى بيشتغل عشان البلد مش اللى بيشتغل البلد بفلوس و يفط و اعلانات عشان الكرسى
الكرسى حيزول و البلد باقيه
اللى حينجح حيفرح و حيحقق طموحه و انت يا اللى انتخبته لو نتخبت واحد غلط مش حتشوف منه حاجه
مش مطلوب منه وظيفه لأبنك ولا اسفلت لشارعك
نائب الشعب وظيفته يراقب الحكومه و يصدر قوانين تريح الشعب و تنظم حياة المصريين
لو اختارت قرطاس حيحطوا فيه اللى نفسهم يعدوه
حتكون شغلته نحن موافقون مش نحن مناقشون
حتكون شغلته نحن منافقون مش نحن مراقبون
يا المصرى اختيارك فى ايدك انت
اشتغل و اتظاهر و انتخب
حقوقك محدش حيجيبها غيرك
اعرفها و اجرى وراها
و اجرى صح
تعبت من المظاهرات؟؟؟ اختار صح عشان ترتاح من التظاهر كل يوم و تلاقى نائب شجاع ما يسكتش على حقك لو حيضيع
عايز أمن؟؟؟ اختار صح عشان تلاقى نائب يضغط من أجل أمن فعال و تعرف انت تشتغل
عايز لحمه ؟؟؟ اختار اللى يعمل برنامج زراعى و حينمى الثروه الحيوانيه مش اللى بيبيعلك لحمه رخيصه دلوقتى
عايز تشتغل؟؟؟ اختار اللى يعمل برنامج اقتصادى صناعى ينمى و يزود فرص العمل مش اللى يجيبلك كارت تتوظف بيه
الحكومه و الحكام زائلون
الأحزاب و الجماعات و الائتلافات زائلون
و الناخبون هم الشعب
و الشعب باقى و فى ايده المفاتيح
و الشعب اللى مصيره بايده هو الفارس هو الحارس
و الأحلام مش عايزه فوارس
الأحلام بالناس تتحقق
و حتعيشى يا ضحكة مصر
المتفائل الفاني
شادى الغزاوى
20-11-2011
